Арбынская сельская библиотека

Олунньу 14 күнүгэр улахан дьон  сылын аайы ыытыллар өрөспүүбүлүкэтээҕи «Сахалыы дьыктаан» аахсыйаҕа кыттан, буойун суруйааччы Тимофей Сметанин «Кыайбыттар ыһыахтара» кэпсээниттэн быһа тардыыны суруйдулар. Хас биирдии кыттааччы туоһу суругунан бэлиэтэннэ, кыайыылаахтар анал ааттарынан наҕараадаланнылар. Ол курдук, “Бастыҥтан бастыҥ суруксут” Сусанна Дмитриевна Иванова, Лариса Борисовна Саввина, “Бастыҥ суруксут” Анисия Васильевна, Лена Васильевна Жирковалар, “Үчүгэй суруксут” Зоя Васильевна Попова, Светлана Олеговна Корякина, Айыына Валерьевна Иванова буолллулар.

Тэрээһин иккис аҥарыгар уксуустуба уонна култуура Арктикатааҕы судаарыстыбаннай институтун студена Дмитрий Иванов  драмкуруһуок артыыстарынан туруорбут Суорун Омоллоон “Сайсары” драматын видеоҕа устуутун экраҥҥа сэргээн көрдүлэр. Ону таһынан култуура киинин уус-уран салайааччыта Владислав Барамыгин толоруутугар «Модун Эр Соҕотох» олоҥхо иһиттибит. Түмүккэ саха төрүт үҥкүүтүн оройуттан тутан, оһуохайдаан ыллыбыт. Кыттыыны ылбыт дьоммутугар, көрөөччүлэргэ истиҥ махталбытын тиэрдэбит!