Арбынская сельская библиотека

Арбын нэһилиэгэр, олунньу 21 күнүгэр Россияҕа Аҕа дойдуну, Саха Өрөспүүбүлүкэтигэр Ийэ дойдуну көмүскээччилэр, Нам улууһугар Кыайыы, Арбын нэһилиэгэр Дойдуга бэриниилээх буолуу сылларын арыйар үөрүүлээх тэрээһин ыытылынна.

Тэрээһин үөрүүлээх чааһа, Кыайыы 80 сылын көрсө нэһилиэкпит биир убаастанар, ытыктыыр киһибит, сэрии, үлэ ветерана, Японияны утары сэрии кыттыылааҕа Савва Потапович Иванов дьиэ кэргэнин чиэстээһинтэн саҕаланна. Савва Потапович билигин биһиги кэккэбитигэр суох да буоллар, кини аатын уолаттара, сиэн уолаттара чиэстээхтик ааттата сылдьаллар. Ол курдук, 4 төрөппүт уолаттара: Вадим, Валерий, Виталий, Владислав Саввичтар Советскай Армияҕа, онтон 5 сиэн уолаттара: Иннокентий, Савва, Арыйаан, Алдан, Айдын Ивановтар бары Россия Армиятыгар ытык иэстэрин толорон, сулууспалаан кэлбиттэрэ. Сиэн уол Савва анал байыаннай дьайыы саҕаланыаҕыттан ыла, 2022 сылтан Аҕа дойдутун чиэстээхтик көмүскүү сылдьар. Савва Потапович 3 уола дойдуларыгар дьиэ-уот туттан, бары ньир-бааччы олороллор, улахан дьиэ кэргэн аҕалара-эһээлэрэ буолаллар. Онтон сиэн уолаттар үөрэнэн, идэ ылан үлэлии-хамсыы сылдьаллар. Биир дойдулаахтара, Ивановтар улахан дьиэ кэргэн аҕаларын, эһээлэрин албан аатын ааттата туралларыттан үөрэбит. Нэһилиэк аҕа баһылыга Игорь Леонидович Гоголев Светлана Егоровна уонна Вадим Саввич, Анна Павловна уонна Валерий Саввич, Сусанна Дмитриевна уонна Виталий Саввич Ивановтар дьиэ кэргэттэригэр махтал сурук туттарда. Биэчэргэ орто оскуола үөрэнээччилэрэ «Саргын ыччаттара” уоланнар бөлөхтөрө литературнай дьүһүйүүнү толордулар, “Майский вальс” үҥкүүлээтилэр. Ырыаһыттар Кузьма Суздалов, Андрей Алексеев, Владислав Барамыгин, эр дьон квартета ылбаҕай ырыаларынан эҕэрдэлээтилэр.

Биэчэр иккис чааһыгар түөлбэлэр дьахталлара, тэрилтэлэр коллективтара эр дьоҥҥо подарок туттардылар. Оскуола коллектива анал байыаннай дьайыыга дойдутун чиэһин хорсуннук көмүскүү сылдьар, биир дойдулаахтарыгар Александр Николаевич Серкиҥҥэ бэйэлэрин оҥорбут “Байанай” хартыынатын төрөппүттэригэр туттардылар. Нэһилиэк аҕа баһылыга Игорь Леонидович Гоголев Кыайыы 80 сылын көрсө олохтообут анал бирииһин  Садуоба күрэхтэһиитин кыайыылаахтарыгар Афанасий Гоголевка эрэһиинэ лодка, Александр Баишевка күлүүс набора, Василий Ивановка термос туттарда. 

Эр дьон Оһуохайа тэрилиннэ. Владислав Барамыгин Оһуохай таһаарда. Нэһилиэк дьахталлара  дэлэй астаах фуршет остуол бэлэмнээн эр дьону күндүлээтилэр.

Нэһилиэк тэрилтэлэрэ:

1. Дьаһалта коллектива – баһылык Гоголев И.Л. дартс;
2. Оскуола коллектива – директор Догордурова К.Н. автомат ыһыыта, хомуйуута;
3. “Сир симэҕэ» оҕо уһуйаанын коллектива – сэбиэдиссэй Колесова А.Е. бэстилиэтинэн ытыы;
4. «Тускул» култуура киинэ, олохтоох библиотека – директор Соловьева О.Н., сэбиэдиссэй Иванова А.Н., воздушканан ытыы;
5. «НКТЭ» АО Арбыннааҕы учаастагын коллектива – сал. Гоголев Л.И. корнхолл.

         Бу күрэхтэһиилэргэ тэрилтэлэр сыаналаах бириистэри туруордулар, тэрийэн ыыттылар уонна кыайыылаахтарга мэтээллэри, бириистэри туттардылар. Тэрээһиммит элбэх киһи кыттыылаах, өрө көтөҕүллүүлээхтик ааста.

      Биэчэр тэрээһинигэр көмөлөспүт түөлбэлэргэ, тэрилтэлэр коллективтарыгар махталбытын тириэрдэбит.