Арбынская сельская библиотека

 

     Нэһилиэккэ олорорго, үлэлииргэ-хамсыырга усулуобуйа баар буоллаҕына бигэ туруктаах буолар. Өрүс нөҥүө нэһилиэктэртэн ыраах сытар Арбын нэһилиэгэр үс сыллааҕыта Намкоммунтеплоэнерго ОАО күүстээх үлэни ыытан кииннэммит квартальнай хочуолунайдартан олохтоохтор итиинэн  хааччыллан олороллор. Маны таһынан, дьиэлэргэ, социальнай объектарга, уу кэлэр буолан, толору хааччыллыылаах буоллулар. Республикабыт Ил Дархана тыа сиригэр маннык үлэлэри ыытарга былааннаах үлэни тэрийбитэ төһүү күүс буолар.

 

                                      * * * * * * * * * * * * * * * * * * * * * * * * * * * * * * * * *

     Арбыҥҥа хаһан да буолбатах бэлиэ күн буолан ааста. Ол курдук, муус устар 20 күнүгэр республикабыт Ил Дархана Егор Борисов Арбын нэһилиэгин олоҕун-дьаһаҕын, ыытыллыбыт үлэлэри көрө-истэ, олохтоохтору кытта кэпсэтэ, туох кыһалҕа баарын билсэ кэлэ сырытта. Ил Дарханы кытта СР министрдэрэ, управление, департамент салайааччылара, «Нам улууһа» МТ баһылыга А.П.Атласов, улуус дьаһалтатын отделларын салайааччылара, тэрилтэлэр директордара, нэһилиэк баһылыктара уо.д.а. кыттыыны ыллылар.

     Егор Афанасьевич үлэтин оҕо саадыттан саҕалаата. Оҕо саадыгар киирэн оҕолору, үлэһиттэри кытта кэпсэттэ, оҕолор ырыаларын-тойуктарын иһиттэ. Үлэ-хамнас хайдах баран иһэрин билистэ. Ол кэнниттэн икки сыллааҕыта тутуллубут саҥа, сырдык, билиигэ кынаттыыр оскуолаҕа тиийэн кылаастарга киирэн үөрэнээччилэрдиин ирэ-хоро сэһэргэстэ. Онтон дьиэлэрин толору хааччыллыылаах гына оҥостубут Григорьев Данил Данилович дьиэ кэргэнигэр сылдьан хайдах дьаһанан, оҥостон олороллорун көрдө-иһиттэ.

     Мантан салгыы «Тускул» СК олохтоохтору кытта көрүстэ. Олохтоохтор долгутар боппуруостарын ыйытаары, туруорсаары элбэх киһи мустубут. Кэпсэтии иннинэ үөрүүлээх быһыыга-майгыга үлэ уонна тыыл бэтэрээнигэр, Арбын нэһилиэгин олохтооҕор Соловьева Анна Иннокентьевнаҕа Улуу Кыайыы 70 сылыгар үбүлүөйдээх мэтээли туттарда.

     Көрсүһүү кэпсэтии быһыытынан барда. Ол курдук, олохтоохтор сүрүннээн ууга баралларынан сибээстээн Алдан уонна Өлүөнэ өрүс төрдүгэр дириҥэтэр үлэ ыытылларын, оҕо саада хаарбах туруктааҕынан саҥа дьиэ тутулларын «Үтүө дьыалаҕа» киллэрэн түргэтэтэри, Хатырыкка диэри суол оҥоһуутун олоҕу кытта тэҥҥэ хардыылыыры, сайдары хааччахтаабакка кытыы сытар нэһилиэктэргэ интернет ситимэ күүһүрэрин, оттуур ходуһалары сөргүтэргэ мелиорация үлэтин тэрийиини, тыа сирин олохтоохторо оҥорон таһааpap бородууксуйаларын сөптөөх сыанаҕа туталларын туруорустулар.

 

С. МАКСИМОВ

(2015 сыл муус устар 22 күнүнээҕи 44 (10276) №-дээх «Эҥсиэли» хаһыаттан)